Këto janë bizneset që po e rrezikojnë të ardhmen e Liqenit të Badocit

Këto janë bizneset që po e rrezikojnë të ardhmen e Liqenit të Badocit

Pas ngufatjes me ndërtime, biznesmenët ia kanë mësyer edhe zonave të gjelbërta të Prishtinës.

Kompania e ndërtimit, e cila ka disa rrokaqiej në Prishtinë “KAWA Group” dhe kompania “4M Group” kanë planifikuar që të ndërtojnë një lagje të vogël me shtëpi buzë Liqenit të Badocit.

Toka është në emrin e Rahman Haradinit, i cili është pronar i kompanisë “Lakeside Gardens”.

Zona në të cilën po pretendohet të ndërkohen shtëpitë, është zonë e mbrojtur dhe sipas dokumentacioneve në fuqi qe e posedon lajmi.net bënë pjesë në zonën e parë të liqenit, ku ndalohet edhe ecja me këmbë nga qytetarët.

Rrethi i kuq i parë -zona e parë mbajtëse, rrethi kuq i dytë -zona e dyte mbajtëse

Lajmi.net ka mësuar se kompanitë e kanë bërë gati dokumentacionin për të aplikuar për leje të ndërtimit në Komunën e Prishtinës.

Kryeshefi ekzekutiv i Ujësjellësit Rajonal “Prishtina, Ilir Abdullahu ka thënë se nuk është në dijeni për një projekt të tillë.

Lajmi.net i ka dërguar fotografitë e projektit në adresën e tij. Më pas, ai ka thënë se nëse do të ndodhë ndonjë ndërtim në atë zonë do të ishte skandal.

“Sipas atij projekti, ndërtimi po ndodhka në zonën e parë, gjë që është e ndaluar rreptësisht. Ajo pjesë është e paraparë që të jetë e rrethuar që as njerëzit të mos futen. Tek ne nuk ka akoma ndonjë kërkesë për pëlqim për ndonjë ndërtim të tillë. Por, po e them, nëse është paraparë ndërtimi në zonën e parë, atëherë Ministria e Ambientit duhet të marrë masa të menjëhershëm që ta parandalojë një gjë të tillë. Ajo lagje do e ndotë krejt liqenin, nëse ndërtohet. Mos të harrojmë se çka do që të ndërtohet në Prishtinë, furnizimi me ujë do të jenë shumë i vështirë, ngase viteve të fundit kanë ndodhur bum ndërtimesh e kapacitetet e ujit janë zvogëluar. Aktualisht, Badovci është minus 10 metra”, tha Abdullahu për lajmi.net.

Shoqëria civile po e kundërshton rreptësisht një ide të tillë.

Në rrjetin social Facebook është krijuar edhe një grup i quajtur “Grupi për mbrojtën e Liqenit të Badovcit”, ku për një kohë të shkurtër ka mbledhur shumë kundërshtar të ndërtimit buzë liqenit.

Në emër të këtij grupi, Ardian Ndrecaj ka thënë për lajmi.net se janë një grup që po e kundërshtojnë ndërtimin në atë zonë, pasi sipas tij, më shumë se gjysma e qytetarëve të Prishtinës marrin ujin e pijes nga aty.

“Ne jemi një grup i qytetarëve që jemi tejmase të brengosur me planet për ndërtime në bregun e liqenit te Badocit, nga ku më shumë se gjysma e qytetarëve të Prishtinës marrin ujin e pijes. Pra, me këtë projekt po iu rrezikohet e drejta e njerëzve për ujë të pijshëm. Sipas disa burimeve, investitorët po thonë se ne do të mbrojmë liqenin, pra sipas çfarë logjike mbrohet një liqe duke ndërtuar dhe futur beton në brigjet e tij? Prishtina nuk ka nevojë për më shumë hapësira me beton, por hapësira të gjelbruara. Ne nuk do të lejojmë ndërtime të tilla fshehtazi nga publiku, krijimi i këtij grupi është vetëm hapi i parë në organizimin qytetar, hapat tjerë do të pasojnë”, tha Ndrecaj për lajmi.net.

Projekti është prezantuar edhe në ueb-faqen e komopanisë “KAWA”.

“Pas zyrtarizimit të dokumentacionit, sot u zyrtarizua edhe marrëveshja trepalëshe, për realizimin e projektit ndërtimor të lagjes pranë Liqenit të Badovcit, “Lakeside Gardens”. Ky projekt vjen si bashkëpunim mes KAWA dhe 4M Group, për të ndërtuar deri në ideale atë që është në letër. Faleminderit gjithashtu pronarit të tokës, Rrahman Haradini, që pronën e tij na besoi neve. Lakeside Gardens do të jetë krenaria e ndërtimit dhe planifikimin për lagje!”, thuhet në një postim që e ka bërë në faqen e saj kompania “KAWA Group”.

Ka reaguar edhe Luan Hasanaj nga organizata e cila merret me ruajtjen dhe mbrojtjen e mjedisit në Kosovë, “Let’s Do It Kosova”.

Ai tha për lajmi.net se duhet mobilizim i qytetarëve që të ndalohet ndërtimi pranë Badocit.

“Ka vite qe organizojmë aktivitete te shumta me qëllim të rritjes se vetëdijes për ta ruajtur liqenin. Duke e ditur fuqinë e bizneseve është e mundur që më ligje dhe vendime e bëjnë te mundur dhënien e lejeve që të ndërtohet, por nëse mobilizohemi jam i bindur që kjo mund të ndalohet. Fundi i fundit ne jemi qytetar që jetojmë në këtë vend dhe në këtë rast nuk na intereson asgjë tjetër përpos mbrojtjes se natyrës, ujit dhe shëndetit tonë”, tha Hasanaj.

Ljami.net ka kontaktuar edhe ministrin në detyrë të MMPH-së, Fatmir Matoshi. Ai ka thënë se nuk është në dijeni për një projekt të tillë.

“Po sa të jem në dijeni do t’iu informoj. Megjithëkëtë, unë u bëj thirrje të gjitha palëve që të kenë kujdes me dhënien e lejeve që më pas mos të kemi keqkuptime. Njëherë nuk mund të them asgjë, as nëse lejohet apo jo ndërtimi në atë zonë, sepse duhet parë dokumentacioni, pasi  nuk jam në dijeni për rastin”, tha Matoshi.

Më poshtë mund të shihni një video dhe disa fotografi të projektit. /Lajmi.net/

COMMENTS

WORDPRESS: 0
DISQUS: