Kështu u fliste Rugova në Gjilan të prekurve nga tërmeti i vitit 2002

Kështu u fliste Rugova në Gjilan të prekurve nga tërmeti i vitit 2002

Më 24 prill 2002, Gjilanin e goditi një tërmet me fuqi mbi 5 ballë të shkallës Rihter. Të nesërmen, këtë qytet e vizitoi presidenti i Kosovës, Ibrahim Rugova, i cili pos që premtoi ndihmën e institucioneve në përballimin e gjendjes, njëkohësisht i ngushëlloi të dëmtuarit duke iu thënë se kjo është prej Zotit.

Kryetari i komunës së Gjilanit, Lutfi Haziri e njoftoi presidentin Rugova me pasojat e tërmetit, i cili la një të vdekur, që ishte humbja më e madhe, mbi 100 të lënduar si dhe dëme të konsiderueshme materiale.

“Mbi 7 mijë banorë jetojnë nën tenda, ndërsa rreth 80 për qind e qytetarëve të kësaj komune nuk kanë guxim të kthehen nëpër shtëpitë e veta, nga frika e dridhjeve të reja, të cilat po vazhdojnë për çdo ditë”, kishte thënë Haziri.

Pasi i ka shprehur keqardhje kryetarit të Komunës për këtë fatkeqësi natyrore, presidenti Rugova ka thënë se kjo është prej Zotit dhe ajo që vjen prej Zotit është më lehtë e përballueshme.

“Të lënduarit Zoti i shpëtoftë dhe do t`i shpëtojë”.

Presidenti Rugova, i përcjellë nga kryetari Haziri dhe komandanti i SHPK-së Sheremet Ahemti, vizitoi zonat më të dëmtuara dhe kaloi nëpër qendrën e qytetit për t’u njohur drejtpërdrejt me pasojat e tërmetit.

COMMENTS

WORDPRESS: 0