Euronews: Ushtria e Kosovës do të armatosë 5 mijë trupa

Euronews: Ushtria e Kosovës do të armatosë 5 mijë trupa

Kuvendi i Kosovës pritet që të premten të votojë projektligjet për transformimin e FSK-së në Ushtri.
Dhe për këtë ngjarje tanimë janë duke raportuar edhe mediat prestigjioze evropiane dhe botërore.

Ndër to, përcjell Telegrafi, është edhe rrjeti televiziv evropian, Euronews, sipas të cilit lëvizjet nga Kosova për të ndërtuar një ushtri kanë zemëruar Serbinë fqinjë, e cila ka hedhur idenë e ndërhyrjes ushtarake.

Siç kujton mediumi në fjalë, në një votim të caktuar për të premten, parlamenti 120-vendësh i Kosovës pritet të miratojë me lehtësi projekt-ligjin e paraqitur nga Qeveria për të kthyer njësinë ekzistuese prej 4,000 vetësh – Forcën e Sigurisë së Kosovës (FSK) – në një ushtri të zgjeruar dhe të armatosur lehtë.

Në këtë drejtim, shkruan ky medium, zyrtarët në Prishtinë kanë mohuar pretendimet nga Serbia se qëllimi kryesor i ushtrisë së propozuar do të ishte pastrimi etnik i veriut të Kosovës me serbë.

“Zyrtarët kosovarë thanë se ushtria e re do të jetë në thelb një forcë sigurie që merret me reagimin ndaj krizave dhe operacionet e mbrojtjes civile – në thelb ajo që aktualisht bën FSK-ja. Ata thonë se detyrat kryesore të saj do të ishin operacionet e kërkimit dhe shpëtimit, asgjësimin e mjeteve shpërthyese, trajtimin e zjarreve dhe materialeve të rrezikshme”, shkruan Euronews.

Ky medium ka cituar nënkolonelin Sylejman Cakaj, një nga komandantët e Ushtrisë Çlirimtare të Kosovës (UÇK) gjatë luftës me Serbinë në vitin 1999 – tani një komandant i batalionit në FSK, i ngarkuar me trajnimin e ushtarëve i cili ka thënë se formimi i një ushtrie të re kosovare nuk ka për qëllim të dëmtojë askënd, sidomos serbët në Kosovë, por më tepër t’i shërbejë të gjithë qytetarëve të Kosovës dhe të bashkohet me misionet paqeruajtëse ndërkombëtare.

Cakaj ka bërë të ditur se rreth 4% e FSK-së përbëhen nga serbët etnikë, të cilët gjithashtu do të transferoheshin në Ushtrinë e re të Kosovës.

Sipas Euronews, përcjell Telegrafi, ushtria e re do të ketë një buxhet vjetor prej 98 milionë eurosh, me 5,000 trupa të armatosur me armë të lehta të këmbësorisë dhe 3,000 rezervistë.

COMMENTS

WORDPRESS: 0
DISQUS: 0